O proxecto europeo Sherpa do Mar, financiado polo Fondo Europeo de Desenvolvemento Rexional (FEDER) a través do Programa Interreg V-A España-Portugal (POCTEP), púxose en marcha en 2019 co fin de crear e consolidar un ecosistema transfonteirizo de emprendemento innovador no contexto mariño-marítimo.
O proxecto, cun orzamento total de 997.184€, foi coordinado pola Universidade de Vigo. Como membros socios do consorcio, ademais da Universidade da Coruña, participaron: Consorcio Zona Franca de Vigo, a Axencia Galega de Innovación (GAIN), a Universidade de Santiago de Compostela, a Associação de Transferência de Tecnologia da Asprela (UPTEC), a Universidade do Porto Inovação (UPorto-UPIN), o Centro Interdisciplinar de Investigação Marinha e Ambiental (CIMAR) e o Fórum Oceano-Associação da Economia do Mar.
Banner do evento de peche e divulgación dos resultados do pasado 31 de marzo de 2022
O pasado xoves 31 de marzo tivo lugar, de modo híbrido (presencial en Santiago e retransmitido vía streaming), o evento de peche e divulgación de resultados deste proxecto. Nesta xornada explicouse que, grazas aos recursos xerados a través da cooperación transfonteiriza, foi posible lanzar ao mercado 12 novas iniciativas empresariais intensivas en coñecemento no ámbito mariño-marítimo da Eurorrexión. Tamén conseguiuse apoiar a 20 empresas para desenvolver a súa competitividade empresarial a través de actividades innovadoras e a elaboración de diagnoses personalizadas de desempeño innovador a 120 empresas de Galicia e norte de Portugal, con actividades relacionadas co mar. En dito evento contouse coa participación do catedrático de Organización de Empresas e coordinador do grupo de investigación Rede da Universidade de Vigo, Xosé Henrique Vázquez, e a directora da Área de Servizos da GAIN, Patricia Fernández Liz.
Presentación dos resultados na sede da GAIN en Santiago de Compostela
As 12 iniciativas empresariais lanzadas no marco deste proxecto, cara máis visible dos resultados de Sherpa do Mar, son iniciativas innovadoras de base tecnolóxica, valorizadas e aceleradas no programa Sherpa Journeys, e achegan solucións innovadoras ás necesidades actuais do ámbito mariño-marítimo. Estas iniciativas abarcan sectores diversos, como o acuícula, o portuario, o conserveiro ou o turístico e aplican tecnoloxías punteiras a retos como a dixitalización, o uso sostible de recursos, a seguridade, o ecoturismo ou a trazabilidade alimentaria.
Unha destas iniciativas emprendedoras, BIMA, foi tutorizada pola Universidade da Coruña. Empleando como base tecnolóxica o GIS (Geographic Information System), permite dixitalizar e modernizar a metodoloxía de traballo no sector marítimo-pesqueiro.
Agradecendo a todas as persoas implicadas a súa dedicación a este proxecto, desde a OTRI da Universidade da Coruña esperamos que esta colaboración poida seguir manténdose a través de novos proxectos nun futuro próximo, para poder dar continuidade a esta iniciativa tan exitosa.
